Tigsik ko a Pilipinas
by Fr. Wilmer Joseph S. Tria
Binoie’nen ni Mrs. Edith Equizabal
(Adapted to this dictionary’s writing system)
Tigsik ko a Pilipinas
Pono’ boayang maonas
Sa rarak-pan, matinglas
Sa irikitan, makaskas
Kaya‘ nakakangalas
Mayaman ana Pilipinas
Alagad, eda’ makaoroalpas
Sa pagti-es apes ma-apas
Tigsik ko ana Kongriso
Pati man ading Sinado
Nagin lele’man man intiro
Nin mga madaya’ ag pasle’
Tigsik ko ana Pilipino
Indi’ pinabasang libro
Kaya’ nagin tao-tao
Nyading politokong korapto
Kaya’ di’ maintindi-an
Ono ana kaostoan
Kin sa bokid agko bolawan
Sira-sira sana nagkakairisiyan
Tigsik ko mga proyikto
Palainlain ana maligno
Sa sakandang mga patraba-o
Eda pagkaisi ana pobliko
Kin indo’ pa nagba-a’
Pirang aldaw ponaw, pa-a’
Yo sakandang mga ena’ena’
Nagin da’patëd na lo-a’
Mga ti-es a Pilipino
Nibilang mga sinsilyo
Baga nagisantorosaryo
Mala’, eda’ sinegnad dawa’ ono
Mabalos baya’ sa mga ayoda
Dawa’ mala-aba’ ading pila
Alagad politikong kontratista
Amo man sana a bida